Бороондох бодлууд...

Өнөөдөр гадаа бороо орж байна
Өнгөт орчлонг саарлаар будна
Өөр өөр хүмүүсийн сэтгэлд
Өнгө өнгийн аялгууг шивнэнэ

Гундайн зогсох тэр охины дээрээс
Гунигаар шивэрсэн бололтой энэ бороо
Гоцолж тоглосон хайрынх нь жүжгийн
Гал нь унтарч бөхсөн бололтой

Урагшлан алхах залуугийн зовлонг
Угаасан бололтой асгарах бороо
Учир нь тэр цалингаа авсан, өрөө төлсөн
Уут дүүрэн юмтай гэрийн зүг яарна

Тас тэврэлдчихээд үнсэлцэж буй хосыг
Тэнгэр шагнаж байгаа бололтой
Дурсамжийн цомогт нь нэмэгдэх энэ өдрийг
Дуслах бороо зурж өгч байгаа бололтой

Би харин хөгжмөө сонсоод
Бөнжигнөх дуслуудыг харан инээмсэглэж
Бороог миний л адил бишрэгч түүнийг
Бодон бодсоор цааш алхана